Usa na usab ka sotpi ang opisyal nga natuli kagahapong adlawa, Mayo 20, 2025, atol sa unang adlaw sa Libreng Tuli Program sa Hoopsdome, nga gipasiugdahan ni Lapu-Lapu City Mayor Junard “Ahong” Chan. Dili lang kini usa ka libreng serbisyo medikal, apan usa usab ka dako nga pahalipay sa mga nangahas nga mga hamtong nga ulahi na natuli.
Ang ikaduhang natuli nga lalaki, nga taga Brgy. Poblacion nga midangat na og kapin 20 anyos ang panuigon, nahagit sa social media post ni Mayor Chan diin giingon nga ang mosanong sa hagit nga magpatuli ilabi na kadtong hamtong na ug dugay nang sotpi makadawat og ₱10,000 gikan sa kaugalingong bulsa sa mayor.
Ang unang duha nga natuli gihatagan dayon og ₱10,000 matag-usa human sa ilang ka agresibo na makab-ot ang ilang “tinuod nga pagkalalake.” Ang programa, gawas sa pagka-medikal, adunay hugot nga cultural ug moral nga mensahe nga nag-awhag sa mga lalaki nga dili na maulaw, ug magpakatinuod sa ilang kaugalingon.
Gisuportahan ang programa sa City Health Office, nga maoy naghimo sa actual nga surgical procedure, uban sa presensya sa mga volunteer nurses ug medical staff. Siguridad ug kahapsay sa lugar gisiguro sa kapulisan ug tanod aron ang mga partisipante ug ilang mga ginikanan o kuyog dili mabalaka kaayo.
Gilauman nga molungtad ang Libreng Tuli program hangtod sa katapusan sa Mayo, ug duna pay dugang nga mga pahalipay nga giplano alang sa mosanong sa hagit ni Mayor Ahong.
Ang mga lalaki nga interesado nga moapil sa maong programa pwede pa mo-register sa ilang barangay health centers o diretso sa Hoopsdome matag buntag. Kinahanglan lang ipakita ang ID ug mosumiter sa ilang health clearance.
I via Renante Socia Lada