Patay ang 2-anyos nga batang babaye, samtang samaran ang inahan, dihang gipangtigbas sa usa ka 31-anyos nga suspetsado, human napakgang ang plano mga pagpanglugos niini ngadto sa usa ka 19-anyos nga inahan, sa Barangay Talak, Sta. Catalina Negros Oriental, kagahapon adlawng Miyerkules, Hulyo 24, 2024 pasado alas 10 sa buntag.
Ang suspek nga nagtingkagol na sa prisohan sa Sta. Catalina Municipal Police Station, naila nga si Junie L. Yanson, 31-anyos, ulitawo ug residente sa lungsod sa Bindoy N.o.
Sa inisyal nga imbistigasyon sa mga kapulisan, nasayran nga ang suspek misulod sa balay sa mga biktima, aron lugoson ang inahan, apan nanglimbasog ug nisukol ang 19-anyos nga inahan, hinungdan nga nibunot ug sundang ang suspetsado, dayong tigbas ngadto sa mga biktima.
Daling gidala ang 2-anyos nga batang babaye sa Bayawan District Hospital, apan gideklarar nga dead on arrival kini sa nag atiman nga doctor.
Samtang ang inahan gidala usab sa Dumaguete Hospital, aron magpaalim sa samad tinigbasan.
Sa tabang sa concern citizen nga daling nakapayo ug tabang sa kapulisan, nadakpan gilayon ang suspek, ug naa na karon sa custodiya sa kapulisan, samtang nagpaabot na lang sa tukmang disposasyon. (Ting Joe Pepito)