Nadakpan sa Cebu City Police Office (CCPO) ang 16 ka tawo nga gituohang nalambigit sa ilegal nga drogas, samtang 573 ka menor de edad ang nasalbar atol sa sunod-sunod nga hugot nga operasyon gikan Enero 19 hangtod 25, 2026.
Sa mga operasyon, nakumpiskar sa CCPO ang 13.45 gramos nga gituohang shabu nga nagkantidad og ₱91,460. Ang tanang nadakpan pasakaan og kaso tungod sa paglapas sa Republic Act 9165 o Comprehensive Dangerous Drugs Act of 2002.
Isip kabahin sa panalipod sa kabatan-onan, ang 573 ka menor de edad nga nasakpan sa curfew violations daling gihatod sa ilang tagsa-tagsa ka barangay GAD ug social welfare offices aron matagan og hustong tabang ug giya.
Ang mga kalampusan sa operasyon nakab-ot pinaagi sa OPLAN BULABOG ug OPLAN BAKAL-SITA, ubos sa pagpangulo ni PCOL George V. Ylanan, Officer-in-Charge sa CCPO, inubanan sa suporta sa PRO-7 ubos ni PBGEN Redrico A. Maranan.
Gihimo usab sa CCPO ang 1,666 ka inspeksyon sa mga establisemento aron masiguro ang pagsunod sa balaod ug ordinansa. Samtang ang CESET nag-isyu og 9 ka citation ticket alang sa gagmay’ng paglapas sama sa pagpanigarilyo, pag-inom ug pag-ihi sa publikong lugar.
Gidayeg ni PBGEN Maranan ang panaghiusa sa kapulisan, LGU, ug mga kaabag nga ahensya, samtang gipamatud-an ni PCOL Ylanan ang padayon nga paningkamot sa CCPO nga mamahimong luwas, malinawon, ug limpyo sa drogas ang Dakbayan sa Sugbo.
Source: CCPO
I via Renante Socia Lada
