Usa ka trahedya sa sunog ang nahitabo sa Sitio Lower Galile, Barangay Duljo Fatima, sayo sa buntag niadtong Domingo, Enero 5, 2025, diin usa ka 13-anyos nga batang lalaki ang namatay ug 20 ka balay ang naugdaw.
Ang namatay giila nga si Wrenchford Rey Abala Cahan, sinagop nga anak ni Marites Ybañez, tag-iya sa balay nga nasunogan. Sumala sa mga saksi, si Cahan na-trap sa sulod sa balay tungod sa kusog nga kalayo ug wala na makagawas. Ang sunog nagsugod alas-4:15 sa buntag gikan sa unang andana sa balay ni Ybañez. Ang mga residente mibiya dayon aron magpahilayo sa peligro, apan wala na maluwas si Cahan, nga natulog pa dihang nagsugod ang kalayo.
Sa laing bahin, tulo ka hamtong ug usa ka bata ang naluwas gikan sa atop sa ilang balay gamit ang hagdan sa mga bombero. Sa datus sa kabomberohan nikabat sa 20 ka balay ang naugdaq ug lima ang apiktado. Samtang 30 ka pamilya ug 120 ka mga indibidwal ang na apiktuhan sa maong sunog. Niabot usab sa P900,000 ang gikatahomg danyos sa maong sunog.
Sa pagkakaron padayon ang imbestigasyon sa Cebu City Fire Station aron mahibal-an ang hinungdan sa sunog. Ang mga awtoridad nagduda nga adunay electrical short circuit nga posibleng nakaingon sa insidente.
Ang Cebu City Department of Social Welfare and Services (DSWS) mipahigayon sa balayran sa punerarya ug sa lubong ni Cahan, nga gilubong karong Lunes, Enero 6, 2025, sa Veterans Cemetery, Barangay Labangon. Kini nga sunog naghatag ug dakong kasubo sa komunidad ug nagpakita sa kaimportante sa pag-atiman sa kaluwasan aron malikayan ang susamang mga insidente. (Renante Socia Lada)