Human sa pagpahigayon og emergency meeting sa City Peace and Order Council tungod sa nahitabong kagubot kagabii sa mga Children in Conflict with the Law (CICL), giluwas ug gi-aksyunan dayon sa mga otoridad ang mga menor de edad nga nalambigit sa curfew violation.
Ang insidente nahitabo pasado alas 11 sa gabii diin nakit-an ang presensya sa mga bata nga naglibut-libot sa pampublikong lugar bisan og naa sa tunga sa curfew hours.
Mikabat og 11 ka menor de edad ang giluwas sa kapulisan sa ilang operasyon. Human sa pagresponde gidala sa police station samtang gi-coordinate sa ilang mga ginikanan ug barangay officials diin sila nagpuyo. Ang mga bata gikan sa lain-laing barangay sama sa Bungtod, Sambag, Gairan, Cogon ug uban pa, ug ang pinakabata nga narescue kay 10 anyos pa lang.
Pagkahuman sa imbestigasyon, ang mga bata gi-turn over dayon sa City Social Welfare and Development Office (CSWDO) subay sa Republic Act 9344 o Juvenile Justice and Welfare Act. Gipasabot nga kini nga aksyon aron masiguro nga protektado ang ilang katungod isip mga menor de edad ug matabangan silang mobalik sa husto nga dalan.
Gipahigayon usab ang counseling alang sa mga bata ug ilang mga ginikanan. Gidugang sa CSWDO ug City Legal Office nga ang mga ginikanan mahimong manubag ilawom sa City Ordinance No. 04-2018 (Curfew Ordinance for Minors). Ang mga silot sa maong kalapasan naglakip sa multa o community service kun dili makabayad. Sugod karong adlawa, gibuhat na ang community service ug diversion program sa mga bata kauban ang ilang ginikanan nga gi-monitor sa mga barangay kapitan.
Gi-warningan usab ang mga ginikanan nga kung dili sila mo-comply sa silot o masakpan napud ang ilang anak nga naggawas sa curfew hours, posible silang pasakaan og kaso ilawom sa RA 7610 ug uban pang balaod nga mohatag og proteksyon sa mga bata. Ang legal team sa LGU andam nga mosuporta sa pormal nga pagsaka sa kaso kung kini magpadayon.
Sa katapusan, gi-anunsyo sa LGU nga palig-onon pa ang implementasyon sa curfew ordinance pinaagi sa kooperasyon sa barangay officials, COBED, CBBPAT, ug kapulisan. Ang curfew alang sa mga menor de edad mag-apply gikan alas 10 sa gabii hangtod alas 4 sa buntag. Gihangyo usab sa kagamhanan sa siyudad ang tanang ginikanan nga magpakabana ug mabinantayon sa ilang mga anak aron malikayan ang susamang insidente sa umaabot.
Source: Bogo City LGU
I via Renante Socia Lada