Nakapahigayon og malampusong operasyon ang Police Regional Office 7 (PRO7) sulod sa usa ka semana gikan Marso 29 hangtod Abril 4, 2026, diin daghang mga suspetsado ug ilegal nga kalihokan ang ilang napugngan.
Sa report, mikabat sa 200 ka anti-drug operations ang gihimo nga misangpot sa pagdakop sa 226 ka mga indibidwal nga nalambigit sa ilegal nga drogas. Nakuha usab ang kapin 819.72 gramos sa ilegal nga drogas nga gibanabanang nagkantidad og ₱5,574,096.00, ug 3,068.84 gramos sa dahon sa marijuana nga nagkantidad og ₱368,280.80.
Sa laing bahin, sa ilang manhunt operations, nadakpan ang 84 ka wanted persons lakip na ang 27 ka Most Wanted Persons, nga usa ka dakong lakang sa pagpakunhod sa kriminalidad sa rehiyon.
Gawas sa kampanya batok sa ilegal nga drogas, gipakusgan usab sa PRO7 ang ilang aksyon batok sa ilegal nga sugal ug armas. Miresulta kini sa 318 ka nadakpan, pagkumpiskar sa ₱60,807.00 nga pusta, usa ka armas, siyam ka eksplosibo, ug 110 ka buok live ammunition.
Sumala kang PBGen Redrico A. Maranan, Regional Director sa PRO7, nagpakita kini nga ang padayon ug tutok nga operasyon sa kapulisan nagdala og tinuod nga resulta. Gipasabot usab niya nga dili tugotan ang bisan unsang matang sa kriminalidad ug magpadayon silang matinud-anon sa ilang katungdanan sa pagpanalipod sa komunidad.
Gipasalig sa PRO7 ngadto sa publiko nga ipadayon nila ang ilang high-impact ug intelligence-driven nga operasyon, samtang giawhag usab ang katawhan nga magpabiling alerto ug motabang pinaagi sa paghatag og tukmang impormasyon sa kapulisan.
Nagpadayon ang PRO7 sa ilang misyon nga maghatag og paspas, matinud-anon, ug kasaligan nga serbisyo sa katawhan sa tibuok Central Visayas.
Source: PRO7 PIO
I via Renante Socia Lada