Padayon ang kampanya batok sa iligal nga drogas sa Police Regional Office 7 (PRO7) nga nakakab-ot og dakong kalampusan human makasakmit og ₱4,014,720 nga kantidad sa shabu sulod lang sa usa ka adlaw nga operasyon gikan Oktubre 17 hangtod 18, 2025.
Sa kinatibuk-an, 15 ka anti-drug operations ang gihimo sa lain-laing dapit sa rehiyon nga miresulta sa pagdakop sa 17 ka suspetsado ug pagkumpiskar sa 590.40 gramos nga shabu.
Ang pinakadakong nakumpiska nga drogas nakuha sa Purok Señorita, Barangay Cabancalan, Mandaue City, diin ang mga operatiba sa City Intelligence Unit (CIU) ug City Drug Enforcement Unit (CDEU) sa Mandaue City Police Office (MCPO), uban ang Regional Intelligence Division 7 (RID7), nakasakmit og 500 gramos nga shabu nga nagkantidad og ₱3.4 milyon ug nadakpan usab ang usa ka 37-anyos nga high-value target.
Sa laing bahin, nakasakmit usab ang Bohol Police Provincial Office (BPPO) og 53.50 gramos nga shabu nga nagkantidad og ₱361,760, ang Cebu Police Provincial Office (CPPO) og 21.50 gramos nga ₱146,200, samtang ang Cebu City Police Office (CCPO) ug Lapu-Lapu City Police Office (LCPO) nakapahigayon usab og mga malampusong buy-bust operation.
Matod ni PBGen Redrico A. Maranan, Regional Director sa PRO7, “Every arrest and every gram confiscated represent a life saved — a family protected and a community secured from the harms of illegal drugs. Our mission goes beyond enforcement; it’s about saving lives and restoring hope.
Gidugang ni Maranan nga ang maong kalampusan usa ka bahin sa gipakusgang kampanya sa PRO7 batok sa iligal nga drogas, iligal nga armas, ug terorismo, subay sa direktiba sa Acting Chief PNP.
Gidayeg usab ni Maranan ang dedikasyon ug panaghiusa sa tanang mga yunit sa Central Visayas ug ang suporta sa komunidad nga nagpalig-on sa kalinaw ug seguridad sa rehiyon.
Source: PRO7- PIO
I via Renante Socia Lada