Duha ka giilang high-value target sa iligal nga drogas ang nadakpan sa buy-bust operation nga gihimo sa Barangay Malabago, Badian niadtong Sabado sa gabii, Agosto 2. Ang operasyon misangpot sa pagkasakmit sa gibana-banang 255 ka gramos sa gituhuang shabu nga nagkantidad og ₱1.73 milyon.
Gipahigayon ang operasyon sa Drug Enforcement Unit (DEU) sa Badian Municipal Police Station (MPS) uban sa koordinasyon sa Philippine Drug Enforcement Agency (PDEA) ug nagsugod alas 8:20 sa gabii.
Sumala sa report sa kapulisan, ang duha ka suspek kaniadto na nasilotan tungod sa drug-related cases apan mibalik sa ilang iligal nga kalihukan sa Badian ug kasikbit nga mga barangay. Giila sila nga mga importante nga sakop sa local nga drug network.
Ang operasyon gipangulohan ni PCPT Jerwin Mark C. Battung, hepe sa Badian MPS. Matod niya, dili lang ni ordinaryo nga buy-bust. Kini usa ka hugot nga plano nga pagpangdakop sa duha ka tawo nga dugay nang hulga sa kalinaw ug seguridad sa komunidad.
Nasakmit sa mga suspek ang mga plastic sachet nga adunay sulod nga shabu nga gibug-aton og 255 gramos ug nagkantidad og ₱1,734,000. Gidetenir na karon ang mga suspek sa kustodiya sa Badian ug giandam na ang mga kaso batok kanila ilawom sa Comprehensive Dangerous Drugs Act.
Si PCOL Christopher M. Bermudez, acting provincial director sa Cebu Police Provincial Office (CPPO), mipasalamat sa tanang ni-apil sa operasyon ug misulti nga dakong kadaugan kini sa kampanya batok drogas sa lalawigan.
Ang operasyon kabahin sa gipalig-on nga anti-drug campaign ubos sa mando ni PBGEN Redrico A. Maranan, Regional Director sa PRO7, nga nag-awhag og disiplina sa kapulisan ug respeto sa katawhan.
Nagpahimangno usab si Cebu Governor Pamela S. Baricuatro batok sa tanang kriminal nga grupo nga ang Sugbo naghinlo na ug gibantayan na sila.
Nagpadayon ang hugot nga kampanya sa kapulisan sa tibuok probinsya sa Sugbo batok sa iligal nga drogas, ug gilauman pa ang mas daghang operasyon sa umaabot nga mga adlaw.
Source: CPPO
I via Renante Socia Lada