Dakong kadaut ang natagamtaman sa lokal nga drug network human madakpi ang usa ka high-value drug personality atol sa buy-bust operation nga gihimo sa kapulisan sa Mandaue City sa alas 8:51 sa gabii, Hunyo 13, 2025, sa Zone Tamatis, Barangay Paknaan.
Ang suspetsado nga giila sa alyas “Lodog” usa ka 40-anyos nga residente sa Zone Talong, Barangay Paknaan, Mandaue City. Gisikop siya tungod sa kalapasan sa Sections 5 (pagbaligya) ug 11 (pagpanag-iya) sa Article II sa Republic Act 9165 o ang Comprehensive Dangerous Drugs Act of 2002.
Ang operasyon gipanguluhan sa City Intelligence Unit (CIU) ug City Drug Enforcement Unit (CDEU) sa Mandaue City Police Office (MCPO) ilawom sa mando ni PCOL Cirilo B. Acosta Jr., uban sa koordinasyon sa Philippine Drug Enforcement Agency (PDEA). Nakumpiskar sa operasyon ang gibana-banang 200 gramos sa gituhuang shabu nga mokantidad og ₱1,360,000.00.
Si Lodog, kinsa gilista isip High-Value Individual (HVI) sa kalihukan sa ilegal nga drug trade, nasikop na usab kaniadtong 2022 tungod sa drug charges ug illegal gambling.
Gituohan nga kini nga pagdakop usa ka dako nga lakang aron maputol ang supply chain sa drogas sa Mandaue. Matod pa ni PCOL Acosta, ang kalampusan sa operasyon usa ka pasidaan sa uban nga aktibo pa sa drug trade nga andam ang mga otoridad nga molihok. Nangayo usab siya sa kooperasyon sa publiko aron makab-ot ang usa ka luwas ug drug-free nga Mandaue.
Gipailawom na sa kustodiya sa kapulisan si Lodog ug gi-andam na ang pagpasaka sa pormal nga kaso batok kaniya sa korte.
Source: MCPO
I via Renante Socia Lada