Nasakmit sa Police Regional Office 7 (PRO7) ang gibana-banang ₱4.2 milyones nga balor sa shabu ug 36 ka drug personalities ang nadakpan sa usa ka adlaw nga dinungan nga anti-illegal drug operation sa tibuok Central Visayas niadtong Disyembre 26, 2025.
Sumala sa PRO7, lakip sa nadakpan ang unom ka high-value individuals. Ang mga operasyon gipahigayon sa nagkalain-laing police units nga nakig alayon pag-ayo sa Philippine Drug Enforcement Agency (PDEA), ilabi na kay kasagaran mosamot ang iligal nga drogas panahon sa holidays.
Ang pinakadakong nasakmit natala sa Dakbayan sa Mandaue, diin nagpahigayon og buy-bust operation ang City Intelligence Unit ug City Drug Enforcement Unit sa Sitio Pilit, Barangay Cabancalan alas 8:47 sa gabii. Usa ka lalaki nga high-value individual ang nadakpan ug mga 150 gramos sa gituohang shabu ang narekober.
Ang tanang nadakpan karon gikustodiya na sa kapulisan, samtang giandam na ang mga papeles alang sa pagpasaka og kaso subay sa Republic Act 9165 o Comprehensive Dangerous Drugs Act of 2002. Ang mga ebidensya gisumite usab sa Forensic Unit alang sa eksaminasyon.
Matod ni PRO7 Regional Director PBGen Redrico A. Maranan, dili tugotan sa kapulisan nga gamiton sa mga kriminal ang panahon sa kasaulogan alang sa iligal nga kalihokan.
Iyang gihangyo ang publiko nga padayon nga makigtambayayong ug mag-report dayon og kadudahang kalihokan aron mapadayon ang kalinaw ug kahapsay sa Central Visayas.
Source: PRO7 PIO
I via Renante Socia Lada