Nadakpan sa kapulisan ang usa ka high-value drug personality human sa usa ka buy-bust operation nga gihimo niadtong Pebrero 8, 2026, sa Purok 8, Barangay De La Paz, lungsod sa Cortes, Bohol. Sa maong operasyon, nasakmit ang gibanabanang ₱2.48 milyones pesos nga kantidad sa gituohang shabu.
Ang operasyon gipangulohan sa Special Operations Unit 7 sa PNP Drug Enforcement Group, uban sa tabang sa Integrity Monitoring and Enforcement Group 7, Regional Intelligence Unit 7, Philippine Drug Enforcement Agency Region 7, ug sa Cortes Municipal Police Station sa Bohol Police Provincial Office.
Atol sa buy-bust, narekober sa mga operatiba ang lima ka heat-sealed nga plastik nga adunay puti nga kristal nga substansiya nga gituohang shabu, lakip na ang nagkalain-laing drug paraphernalia nga gigamit sa ilegal nga transaksiyon sa drogas.
Ang tanang ebidensya gipadala na sa Bohol Provincial Forensic Unit alang sa laboratory examination. Samtang ang suspek karon detanggong sa custodial facility sa Cortes Municipal Police Station ug mag-atubang og kaso tungod sa paglapas sa RA 9165 o Comprehensive Dangerous Drugs Act of 2002.
Gidayeg ni Police Regional Office 7 Director PBGen Redrico A. Maranan ang mga kapulisan ug partner agencies sa malampusong operasyon.
Matod pa niya, dako kini’g tabang sa pagpanalipod sa komunidad, ilabi na sa kabatan-onan, ug padayonon sa PRO7 ang tinutokan ug hiniusang mga operasyon batok sa ilegal nga drogas.
Source: PRO7 PIO
I via Renante Socia Lada