Cagayan de Oro – cMakig uban ang dakbayan sa Cagayan de Oro sa mga lokal nga kagamhanan ug stakeholders sa usa ka mass bamboo planting activity nga ilang gilauman nga makatala sa Guinness Book of World Records nga rekord sa kadaghanang kawayan nga gitanom sulod sa usa ka oras.
Atol sa flag raising program niadtong Lunes, si City Administrator Roy Hilario Raagas miingon nga ang mass bamboo planting activity nga gikatakda karong Septiyembre gilusad sa Department of Science and Technology (DOST-10) kauban ang mga opisyal sa Bukidnon ug Cagayan de Oro City Hall. ‘Ang Northern Mindanao lakip ang Cagayan de Oro City moapil niini nga kalihokan,’ matud ni Raagas.
Ang kalihokan sa pagpananom og kawayan dungan sa tinuig nga pag-obserbar sa Philippine Bamboo Month sa Septiyembre ug World Bamboo Day sa Septiyembre 18. Matud pa ni Raagas nga ang mass bamboo planting activity itakda sa ulahing bahin sa bulan diin anaa 10 ka ektarya sa Sitio Pamalihi, Barangay Pagatpat ang igahin.
Manguna sa kalihokan sa dakbayan mao ang City Agricultural Productivity Office ug ang City Local Environment and Natural Resources Office (CLENRO), matud ni Raagas. Kaabag sa City Hall ang pipila sa mga barangay ug kooperatiba sa dakbayan sama sa Kolago Farmers Cooperative ug City Farmers Confederation ug uban pa, matud niya.
Matud ni Raagas nga usa ka bahin sa river boulevard ang igahin alang sa programa. Ang dugang nga mga detalye sa kalihokan ibutyag sa umaabot nga mga semana sa DOST-10, City Tourism and Cultural Affairs Office ug CLENRO. Ang grupo sa mga validator gikan sa Guinness Book of World Records moabot (sa siyudad) alang sa kalihokan.
News and photo courtesy of CIO CDO