CAGAYAN DE ORO CITY- Ang lokal nga kagamhanan sa syudad sa Cagayan de Oro kagahapon, Lunes mipagaan sa quarantine measures niini pinaagi sa pagpabukas sa mga malls, restaurants ug bisan sa uban nga mga essential establishments. Si Mayor Oscar Moreno milagda sa bag-ong quarantine guidelines nga ipaepekto sud sa Mayo 1 hangtud 15.
Gipasabot ni Atty. Jose Edgardo Uy, ang hepe sa economic cluster sa Emergency Operations Center (EOC) sa City Hall nagsugilon nga magpabilin pa gihapon ang barangay exit passes, pagtaod sa face masks, physical distancing, ang 9PM-5AM nga curfew ug uban pang health measures nga padayong ipatuman sa dakbayan.
Gidugang sa pagpasabot ni Uy nga tugutan man tuod ang mga malls ug restaurants sa pagbukas ubos sa kondisyon nga ipatuman ang social distancing. Samtang sa pikas bahin, nagapadayon ang ilang panawagan sa katawhan sa pagpabilin sa pagpuyo sa balay ug mogawas lamang kon kinahanglanon gayod ang ilang pagabuhaton.
Giklaro usab ni Atty. Uy nga magpabiling sirado ang mga sinehan, gym, night spots hangtud nga ilang ihatag ang abiso niini.