Mag-hire og dugang mga medical health personnel ang CDO LGU aron makatabang pag-atiman sa mga pasyente nga natakboyan sa Covid-19, ilabina diha sa JR Borja General Hospital (JRBGH).
Kini ang gi-anunsyo ni Mayor Oscar Moreno atol sa virtual press briefing agi’g tubag sa padayong pagtaas sa mga kaso sa Covid-19, ilabina nga nakasulod na dinhi sa Cagayan de Oro ang Delta variant.
Gibutyag sa mayor nga dili sayon ang hiring sa mga medical personnel sama sa mga doctors ug nurses tungod kay adunay proseso nga gisunod ang syudad, apan mipasalig si Mayor Moreno nga pangitaan kini og paagi aron mapaspasan ang proseso.
Samtang, gimandoan ni Mayor Moreno ang Human Resource Management Office ug City Budget Office nga i-freeze una ang hiring sa mga empleyado sa ubang mga departamento ug opisina sa city hall aron ma-prioritize ang hiring sa medical personnel.
Sa laing bahin, nagpasalamat si Mayor Moreno sa Department of Health Region 10 human nag-augment ang maong ahensya og 12 ka mga nurses aron idugang sa mga personahe nga nadestino diha sa city isolation units (CIUs) ug temporary treatment and monitoring facilities (TTMFs). (City Hall)