Cagayan de Oro City – Gipahinumduman ang mga online sellers sa Facebook sa pagkuha sa ilang business permits madako man o gamay ang ilang negosyo aron kini mamahimong legal. Matud pa ni Assistant Treasurer for Operations Engr. Leonil Mistula nga ang mga online sellers mga retailers man sila, busa angay lang nga mokuha sila sa business permits. Gani pa man ang mga online buyers iawhag sa pagpangayo sa resibo gikan sa mga online sellers alang sa ilang proteksyon ug aron matabangan ang gobierno sa pagkolekta sa buhis.
Si Engr. Mistula nagadasig sa mga online sellers, business ug real property owners sa pagbayad sa buhis online silong sa New Normal pinaagi sa website/portal www.citytreasurer.cagayandeoro.gov.ph kadtong nagtinguha sa linawas nga pagbayad sa ilang buhis gitambagan nga anha lang sa Business One Stop Shop sa City Hall haduol sa mini park.
Gipasabot ni Mistula nga ang Online transactions kabahin kini sa pagsunod sa City Hall sa Republic Act 11032 nga gilagdaan ni President Rodrigo Duterte sa pagpromote sa kasayon sa paghimog negosyo pinaagi sa zero contact policy. Gikinahanglan usab kini nga set up sa pagseguro nga mapatuman gayod ang physical distancing nga gimando niining panahon sa Covid-19 pandemic, dugang pa ni Mistula. (City Information Office)