Cagayan de Oro City – Paborableng girekomendar sa konseho sa syudad ubos ni bise mayor Kikang Uy ang hangyo nga mapundohan sa nasudnong gobyerno ang pipila ka proyekto sa dakbayan nga magpalapad sa kampanya kontra Covid-19.
Lakip sa gisugyot nga proyekto mao ang Cagayan de Oro Covid-19 response/recovery augmentation balor ₱ 150 milyones nga naglangkob sa pagpalit og dugang personal protective equipment (₱ 10 milyones); pagpalit og equipment, reagents ug kits alang sa Covid-19 testing (₱ 25 milyones); pagpalit og dugang medisina ug bitamina (₱ 15 milyones), hospital equipment ug supplies (₱ 10 milyones) ug disinfectant, sprayers, disinfectant tents, ug uban pang disinfecting supplies ug misting equipment (₱ 15 milyones).
Gihangyo usab ang dugang pundo alang sa pagkaon ug transportasyon balor ₱ 5 milyones, pagmintinar ug pagtul-id sa mga ambulansya, medical transport vehicle ug emergency response vehicle balor ₱ 5 milyones, food assistance ug uban pang relief goods balor ₱ 25 milyones ug bayad alang sa renta sa dugang space/buildings alang sa Covid-19 suspects balor ₱ 25 milyones.
Mokabat usab sa ₱ 10 milyones ang gihangyong pundo alang sa renta sa tents/spaces alang sa temporary shelters sa mga homeless ug ₱ 5 milyones alang sa pagpahigayon og training sa mga personahe dinha sa Covid 19 testing ug uban pang susamang trainings.
Si bise mayor Kikang Uy midugang nga ang gihangyong pundo gitumong sa paghatag og kapaseguroan sa mga frontliners nga naglangkob sa mga sakop sa Barangay Health Emergency Response teams (BHERTs), Incident Management Team (IMT), health centers, hospitals, City Isolation Units (CIUs), Temporary Treatment and Monitoring Facilities (TTMFs), testing ug holding areas ug entry points.
Makatabang usab kini nga mahitsasan ang gipanag-iyahan sa dakbayan nga Emerging and Re-emerging Infectious Disease (ERID) Facility, panapos sa bise mayor.
Ang hangyo sa dakbayan pinasubay sa Local Budget Circular No. 128 nunot sa RA 11494 kon Bayanihan to Recover as One Act nga naggahin og igong pundo agig suporta sa kampanya sa mga lokal nga kagamhanan kontra Covid-19.
Ang resolosyon nga gipasaka sa konseho alang sa maong katuyuan gipaluyohan sa komite sa panalapi ni konsehal Edna Dahino ug komite sa pamalaod ni konsehal Ian Mark Nacaya. (Sangguniang Panglungsod)