Gihan-ay na sa Oro Trade and Investment Promotions Center (Oro-TIPC) sa CAGAYAN de Oro City Hall sa pakigtambayayong sa Filipino-Chinese Community ang opisyal nga kalendaryo sa mga kalihokan alang sa 2025 Chinese New Year celebration.
Matud ni Oro-TIPC Department Manager John W. Asuncion ug Cagayan de Oro Filipino-Chinese Community Chairman Benjamin Chan nga ang selebrasyon karong tuiga magpakita sa mga bag-ong kalihokan sama sa Wok of Fortune: Culinary Exhibit sa Pebrero 2 sa Limketkai Mall ug usa ka Medical and Dental Mission sa Pebrero 4 sa Limketkai Atrium.
Dugang pa niini nga pagsaulog sa Bag-ong Tuig sa Tsino karong tuiga ilabinang espesyal tungod kay naatol kini sa ika-50 nga tuig sa panaghigalaay tali sa China ug Pilipinas.
Pagsugod sa Chinese New Year celebration mao ang ceremonial lighting sa Lunes, Enero 27, alas 6 sa gabii. Usa ka pyro-musical fireworks display ang ipahigayon karong Enero 28, 5 p.m. sa Rio de Oro Boulevard. Ang Tradisyon ug Seremonya sa Bisperas sa Bag-ong Tuig mahitabo unya nianang adlawa sa alas 11:00 sa gabii.
Ang libreng tikoy ipanghatag sa mga bisita sa Bell Church sa alas 10 sa buntag sa Chinese New Year, Enero 29. Ang mga kompetisyon sa dragon boat nga magpasundayag sa mga partisipante gikan sa nagkalain-laing dapit sa nasod ipahigayon usab karong Pebrero 1-2 sa Isla de Oro.