Cebu City – Hapit na mahuman ang dugay nang gipaabot nga CCLEX o Cebu Cordova Link Expressway kay hangtod gahapon, 75 porsyento na kining kompleto.
Sa usa ka site tour nga gi-host sa CCLEC o Cebu City Link Expressway Corporation ug sa MPTC o Metro Pacific Tollway Corporation, ilang gipakita ang nagpadayong construction sa taytayan nga magdugtong sa Cordova ug Cebu City.
Si Robert Uthwatt, project manager sa COWI, miingon nga ang gap tali sa duha ka kilid sa bridge 104 metros na lang ug naglaom silang masera ang gap sa Nobyembre.
Sa higayong masumpay na ang kilid sa tulay, mahimo na kining maagian ug mosunod ang ubang constructions.
Ang target sa operations sa expressway sa Pebrero sunod tuig pero adunay ubang factor nga makabalda sa target sama sa bagyo ug pandemya.
Matod ni Uthwatt, tumong nila ang kataposang semana sa Pebrero ngadto sa unang semana sa Marso 2022.
Pagka karon, padayong gitrabaho ang CCLEX diin ang 41 sa 65 ka kable na montar na.
Ang girder installations gamit ang launching gantry ug plank installations nagpadayon usab sa Cebu South Coastal Road (CSCR) sa on-ramp ug off-ramp extensions. (Jhon Tadlip/JTY)
(News & photos courtesy of CCLEX | PAGEONE)