SUBLING gipadayag ni Mayor Rolando ‘Klarex’ Uy ang adbokasiya paglantaw sa maayong kaugmaon sa mga kabatan-onan atol sa gipahigayon nga ‘Leadership for Adolescent Youth-Friendly Cities’ (LAYFC) kauban ang ubang local chief executives ug sakop sa city leadership team pinaagi sa zoom, Oktubre 12 ning tuig.
Ang LAYFC gipasiugdahan sa The Challenge Initiative, Zuellig Family Foundation ug Commission on Population sa tuyo nga matutokan ang adolescent and youth sexual and reproductive health (AYSRH) programs aron mamenusan sa hingpit ang insidente sa ‘teenage pregnancy’.
Atol sa presentasyon ni Mayor Klarex, gipunting niini ang kamahinungdanon nga mahatagan sa igong pondo alang sa pagpakusog sa pagpatuman sa nasangpit nga programa.
Gisaysay usab sa mayor nga anaa ang buhatan sa Community Improvement Division kinsa partikular nga mitutok sa adolescent health and development program, uban sa suporta sa City Health Office ug uban pang mga stakeholders.
Ubos sa AHD program, nagpahigayon ang CID og mga educational sessions sama sa adolescent & sexual reproductive health (ASRH) ug learning package for parent education (LPPE) sa mga barangay ug tunghaan.
Lakip usab sa programa ang hugot nga koordinasyon tali sa Department of Education, mga tunghaan, Sangguniang Kabataan, opisyales sa barangay alang sa pagtukod og school-based ug community-based teen centers.
Ang Commission on Population (POPCOM X) ang gapahigayon sa youth development training sa mga POPDEV clubs samtang ang CID usab ang nagsilbing secretariat sa information and delivery network (ISDN for AHD).
Atol sa ‘Klarex nga Serbisyo sa Baryo’ community outreach program ni Mayor Klarex, lakip sa serbisyo nga gihatag sa CID ang programa sa adolescent health and development diin adunay pagpahigayon og learning sessions sama sa ASRH ug LPPE sa mga grade 9 students.
Gipasigarbo usab ni Mayor Klarex nga na-accredit na sa Department of Health Region ang duha ka mga health facilities nga nahimutang sa Barangay Canitoan isip Level 2 nga Adolescent Friendly Health Facilities, ug sa di madugay ang mga health facilities usab sa barangay Carmen, Tablon ug Gusa.
Nagtuo si Mayor Klarex nga kung mapakgang ang suliran sa ‘teenage pregnancy’, mamenusan usab ang insidente sa kapobrehon sa matag pamilya.
“Molambo ang mga kabatan-onan ug mamahimong asset sa gobyerno. Ang akong kalipay mao ang pagsud-ong sa malipayong inahan ug amahan kay ang ilang anak nakahuman sa kolehiyo ug nakatrabaho nga may medyo taas-taas nga sweldo”, saysay ni Mayor Klarex.
Source: CIO-Cagayan de Oro