Gilaraw karon ni Mayor Rolando ‘Klarex’ Uy nga magbutang o’ magpintal og marka sa dalan kon ‘demarcation lines’ aron hapsay ang pagpamaligya sa mga sidewalk vendors ug dili makabalda sa dagan sa trapiko ning panahon sa kapaskohan.
Samtang nasabtan sa mayor ang pagpanginabuhi sa mga sidewalk vendors, gipasabot ni Mayor Klarex atol sa iyang programa sa radyo, ‘Inyong Alagad: Mayor Klarex Uy’ adlaw’ng Biyernes, nga adunay mga higayon nga masupak sa mga mamaligyaay sa sidewalk ang nalatid nga mga kondisyones sa syudad.
Busa, gihangyo ni Mayor Klarex ang Roads and Traffic Administration kon RTA nga magpintal og ‘demarcation lines’ sa dalan aron dili sila makalapas sa linya diin sila gitugotan pagpamaligya.
Hinoon, konsultahon pa sa mayor ang mga kadagkoan sa City Economic Enterprise Department (CEED), City Local Environment and Natural Resources Office (CLENRO, Regulatory Compliance Board ug RTA bahin niini nga lakang aron makuha ang ilang mga suhestiyon ug huna-huna.
(Source: CIO-Cagayan de Oro)