Mas gipahugtan sa panggamhanan sa Misamis Oriental ang pag-monitor sa mga entry points sa probinsya pinaagi sa ordinance NO. 1477-2020 gumikan sa nagpadayun nga hulga sa Avian Influenza kon Bird Flu sa nasud.
Gani, malampusong napugngan sa Municipal Quarantine Veterinary Station sa Laguidningan ang pagpalusot sa mga itlog (balut) nga planong ihatod sa probinsya sa Bukidnon, niadtong Sabado, Marso 12, 2022 nga gikumpirmang gikan sa Mexico, Pampanga kung asa adunay natala nga kaso sa bird flu.
Nadikubre ang virus niadtong bulan sa Enero sa Rehiyon 3, misulod sa Rehiyon 5 sa bulan sa Pebrero, ug sa miaging semana, adunay nasuta nga kaso sa Region 12, siyudad sa Tacurong, probinsya sa Sultan Kudarat rason nga gihangyo ni Gobernador Bambi Emano ang katawhan sa probinsya sa hugot nga kooperasyon hilabina niining panahona aron mapuggan ang pagsulod sa maong sakit nga makaapekto og dako sa poultry industry ug sa mga konsumante.
(Source: Prov’l Veterinary Office | Misamis Oriental Provincial Information Office Facebook page)