Dakpon na ang mga bao-bao nga moagi sa national highway sugod karong Huwebes, Hulyo 27, 2023 nunot sa paglusad sa Oplan: “Task Force Puerto” nga gimugna ni Mayor Klarex Uy subay sa Memorandum Circular No. 2020-036 sa Department of Interior and Local Government (DILG).
Tumong sa memorandum sa DILG nga maundang ug mawala ang tanang bao-bao/trikabs, motorized tricycles, trisikads, ug motorela nga ilegal nga nag-operate sa national highway, partikular na sa mga boundaries sa Barangay Bugo, Puerto, Agusan, Tablon, Cugman, Gusa, ug Lapasan nga gitudlo isip usa sa mga hinungdan sa paghuot ug hinay nga dagan sa trapiko ilabina sa lugar sa Barangay Puerto.
Sa coordination meeting nga gidumala sa Roads and Traffic Administration (RTA) uban sa buhatan sa Land Transportation Office (LTO-10), Land Transportation Franchising and Regulatory Board (LTFRB-10), Department of Public Works and Highways (DPWH-10), Police Regional Office (PNP-10), Cagayan de Oro City Police Office (Cocpo), Bureau of Fire Protection (BFP-10) ug sa nagkadaiyang buhatan sa city hall, nauyonan nga hugot kining ipatuman ang memorandum sa DILG.
Gipasabot ni Engr. Nonito Oclarit, RTA Dep’t Manager, nga wala gitugot sa balaod nga himoong pamasaheroan ang bao-bao, ilabina ang pag-agi sa national highway.
Gani, wala kini prangkisa gikan sa LTFRB, bisan kung gi-rehistro sila sa LTO wala nagpasabot nga himoon kining pamasaheroan kay private use lamang kini.
Nasayran sa bulan sa Marso nga record, mokabat na sa 450 ka units sa bao-bao ang nag-operate ning syudad ug dako ang posibilidad nga nadugangan na karong panahona.
Alayon niini, subling nagpahimangno ang Task Force nga sa operasyon karong Huwebes walay pasayloon nga bao-bao nga ilang madakpan nga mamasahero ug moagi sa national highway.
(News and photo courtesy of CIO CDO)