Pormal nang gilusad sa kagamhanang lokal sa Cagayan de Oro sa pagpangulo ni Mayor Rolando ‘Klarex’ Uy ang bivalent third booster vaccination rollout alang sa mga sakop sa healthcare workers ug senior citizens nga gipahigayon sa Macanhan covered court, Hunyo 29 ning tuig.
Mapasalamaton si Mayor Klarex sa rehiyonal nga buhatan sa Department of Health sa paggahin og 3,680 bivalent vaccines isip dugang proteksyon batok COVID-19.
“Magpabakuna ko kay maniguro ko nga makabaton sa kahimsog nga panglawas nga adunay proteksyon sa pag-atubang ug pagpadayon sa akong pag-pangalagad kaninyo”, pamahayag sa mayor.
Sa pagkakaron, ang bivalent vaccines gigahin alang pa lamang sa mga healthcare workers ug senior citizens kinsa natupokan sa ilang second booster upat ka bulan na ang milabay.
Mahimong magpabakuna sa third booster sa City Health Office, alas 9:00 sa buntag hangtod alas 4:00 sa hapon, Lunes hangtod Biyernes.
Gi-awhag ni Dr. Ellenietta Gamolo, Assistant Regional Director sa DOH-10, ang katawhan nga kompletuhon ang primary ug booster vaccines alang sa hingpit nga proteksyon batok sa virus.
Lakip misaksi sa maong kalihukan si kanhi Vice Mayor Raineir Joaquin ‘Kikang’ Uy ug mga kauban ang barangay Carmen Council, City Councilor Maria Lourdes S. Gaane, City Information Officer Ivy S. Guantero, City Health Officer Dr. Rachel Daba-Dilla, CHO- National Immunization Program Medical Coordinator Dr. Ina Grace Chiu, City Health Insurance Office Department Manager Dr. Efren G. Celeste, ug JR Borja General Hospital Overseer Dr. Ferdinand Miranda.
Sa laing bahin, dungan usab nga gilusad ang mobile clinic sa barangay Carmen sa pagpangulo ni Kapitana Lorna Uy ug former VM Kikang, nga nagtanyag og libreng X-Ray, ECG, laboratory, ultrasound ug medical check-up alang sa mga senior citizens sa nagkadaiyang zona sa barangay Carmen.
(News and photo courtesy of CIO CDO)