El terser super health center que tiene objeto para dale y responde na maga necesidades de salud del maga residente ay construi na Barangay Manicahan por medio del iniciativo del Senador Bong Go y el Departamento de Salud na asistencia del Congresista Mannix Dalipe del Distrito 2.
Este dia, Julio 30, ya conduci el groundbreaking ceremony na sitio Aplaya, Barangay Manicahan, que ya encabeza el Sen. Go, na representacion di Jade Jamolod, oficiales desde DOH, Alcalde John Dalipe, Vice Alcalde Josephine Pareja, Cong. Dalipe na representacion di Jojo Dalipe y Barangay Capitan Erolyn Natividad.
Ya expresa gratitud el Alcalde Dalipe con el Sen. Go y DOH y Cong. Dalipe por el di ila dedicacion para sirvi con el maga residente na maga lugar que nuay acceso na maga servicio de salud en particular maga especial servicio como X-Ray, ultrasound, diagnostic, pharmacy y otro servicio de emergencia.
El primer super health center ta construi ya na Barangay Sangali mientras el segundo facilidad na Talon-talon ya principia ya consrui despues el groundbreaking ceremony del Junio 6.
Na su video message, el Sen. Bong Go ya habla que el proyecto, que ya conceptualiza durante el termino del Presidente Rodrigo Duterte, ta sirvi como testamento y realizacion del promesa del govierno nacional para lleva y dale maga importante servicio con maga residente quien ta necesida mas con el ayuda.
Ele ya promete que ay continua el esfuerzo del su oficina junto con el DOH, oficina de Congresista Dalipe el Alcalde Dalipe para mucho pa otro maga proyecto el puede beneficia el Ciudad de Zamboanga.
Presente durante el programa el DOH Assistant Regional Lenny Joy Rivera, City Health Officer Dr. Dulce Miravite, City Police Director Col. Alex Lorenzo, Executive Assistant JR Natividad, oficiales de barangay, maga staff de CHO y DOH-9 y otro pa.
(Source: City Government of Zamboanga Facebook page, photo courtesy by Manicahan BION BJ Angeles)