Naglaum si Mayor Rolando `Klarex’ Uy nga tumanon ug sundon sa mga alacart ug food cart vendors sa Cogon Market area ang ilang natun-an sa orientation seminar on food handling nga gipahigayon sa City Health Office bag-ohay lamang.
Kini human naobserbahan ni Mayor Klarex nga magpuli-puli og tuslob sa sauce ang mga kustomer samtang nagkaon sa ilang gipalit nga barbecue, proben ug uban pa.
Matud pa sa mayor nga dili kini luwas nga pamaagi ug dako ang posibilidad nga adunay makakuha og sakit kung magpadayon kini ug dili na ganahan mopalit ang ubang mga kustomer o kaha mga bisita.
Dugang pa ni Mayor Klarex nga adunay daghang pamaagi nga malikayan ang maong sistema aron sigurado nga limpiyo ug luwas ang pagkaon nga gibaligya.
Gisugyot sa mayor nga mogamit og gagmay nga paper plate sama sa gigamit sa mamaligyaay og siomai ang food cart vendors aron maoy sudlan sa ilang proben ug dili na magtuslob sa sudlanan sa sauce gamit ang stick.
(News & photo courtesy of City Information Office CDO)