Mikabat na sa 17,009 ka mga patigayon dinhi sa dakbayan sa Cagayan de Oro ang hingpit nang naka-renew sa ilang business permit, sumala pa sa pinakaulahing datos niadtong Pebrero 6 sa Business Permits and Licensing Office (BPLO).
Matud pa ni BPLO head Jason Adaza, sa maong ihap, 1,012 niini ang nagpa-renew pinaagi sa online business permit renewal nga gitanyag sa syudad.
Kadaghanan sa mga patigayon mga retailers nga mikabat sa 3,320, ug gisundan kini sa 2,483 ka service providers, ug 2,173 ka sari-sari stores.
Samtang, mikabat na usab sa 692 ka mga bag-ong patigayon dinhi sa dakbayan ang naka-apply na sa ilang business permits.
Subay niini, giawhag sa BPLO ang mga tag-iya og patigayon ning dakbayan sa pagduso sa ilang business permit renewal samtang nagkaduol na ang extended deadline karong Pebrero 28, 2023.
(News & photo courtesy of CIO – CDO)