MALIPAYON human misalmot ang 32 ka breastfeeding moms sa ikaduhang milkletting activity samtang 70 ka inahan ang misalmot sa First 1000 Days forum nga dungan gipahigayon sa City Nutrition Committee, Septiyembre 28, diha sa barangay Kauswagan Hall, ning siyudad.
Sumala ni Mercy Junio, molupyo sa barangay Kauswagan ug usa sa mga midonar sa iyang breast milk miingon: “Nalipay ko nga nakatabang ko sa mga mama nga dili makahatag og gatas sa ilang mga anak. Ma-feel man gyud nako kung wala ko’y gatas mao nang nalipay ko bahala’g gamay ra akong na-donate at least naa ko’y nakatabang gamay.”
Mikabat sa 3,240 mL ang nakolekta nga gatas sa inahan diin matag usa kanila nakadawat og libreng 3-kilo rice ug hygiene kit gikan sa City Nutrition Committee.
Samtang sa forum, gihisgutan ni City Health Office (CHO) Infant Young and Child Feeding (IYCF) Coordinator Caroline A. Cabunoc ug CHO City Nutrition Program Coordinator Sherill Faith P. Española ang topiko kalabot sa ‘Importance of 1st 1000 Days Guide in Breastmilk Expression.’
Mipaabot usab sa iyang mensahe si City Health Officer Dr. Rachel D. Dilla diin iyang gisaysay ang bili sa First 1000 days.
“The first 1000 days is very important ilabina gyud paggawas sa bata, magsugod na gyud paggawas sa bata, magsugod na sad dayon ang atong pag-dede taman at least 6 months, taman 2 years or taman sa ganahan pa gyud siya ug naa pa sya’y gatas,” saysay ni Dr. Dilla.
Gawas ni Dr. Dilla, mihatag usab sa iyang mensahe si City Nutrition Action Officer Nenita F. Rabe.
Ang First 1000 days Forum and Milk Letting Activity gipasiugdahan sa City Nutrition Committee uban sa City Health Office, ug gisuportahan sa mga nurses sa Northern Mindanao Medical Center (NMMC) Human and Milk Bank Lactation Unit ug JR Borja General Hospital, lakip mga interns gikan sa Central Mindanao University ug Lourdes College, Barangay Nutrition Scholars, IYCF Task Force ug Cagayan de Oro City Police Office.
Ang maong kalihokan gipaluyohan sa Purple Yam ug Kauswagan Barangay Council ubos ni Punong Barangay Pedro D. Balite.
Photo by Reynan Baylin
Source: CIO-Cagayan de Oro
