Cagayan de Oro: City vet subling nakasakmit og 22 ka baboy nga walay dokumento

0
1

Tungod sa hugtanon nga pagbantay sa nagkadaiyang animal quarantine checkpoint, laing 22 ka mga baboy nga walay dokumento ang nasapon ug gi-imbargo sa mga personahi sa City Veterinary Office bag-ohay lamang.

Nasayran nga ang maong mga baboy gikarga sa usa ka Bongo nga trak diin pag-abot sa animal quarantine checkpoint sa Taboc, Opol Misamis Oriental, wala mihunong ang drayber ug mipakusog hinuon kini sa pagpadagan.

Apan nasapon sa migukod nga mga personahi sa City Veterinary Office ang sakyanan sa NHA Barangay Kauswagan ning syudad.

Wala nakapakita og igong dokumento ang drayber pagmatuod nga luwas sa sakit ang mga baboy gikan sa lugar kon asa niya gikumpra ang mga baboy ug kini usa ka kalapasan sa City Ordinance No. 14043, Executive Order 95, ug Department of Agriculture Administrative Order No. 5 series of 2019.

Sa imbestigasyon sa City Vet sa drayber, giingon nga sa lungsod sa Laguindingan gikumpra ang mga baboy apan dili kumbinsido ang City Vet. Tungod kay wala kini dokumento, gi-disposed sa mga personahi sa City Vet ang 22 ka mga baboy pinaagi sa pag-culling dayon gilubong sa usa ka lugar sa Barangay Mambuaya.

Nunot niini, subling nagpahinumduman ang syudad ubos sa administrasyon ni Mayor Rolando `Klarex’ Uy pinaagi sa City Veterinary Office pinangulohan ni City Veterinarian Dr. Perla Asis nga gidili pa ang pagpasulod og mga buhing baboy, karneng baboy ug uban pa nga mga pork products dinhi sa syudad ilabina gikan sa Zamboanga Peninsula kun asa adunay outbreak sa African Swine Fever (ASF).

Gipasabot ni Dr. Asis nga mas alerto ug gipahugtan pa sa syudad ang pagbantay nga dili na subling maigo sa ASF virus ang Cagayan de Oro ilabina nga paingon na kini sa pagbangon. (Cheleste Simene, photo courtesy of City Vet)

LEAVE A REPLY

Please enter your comment!
Please enter your name here