Makabaton na og dugang classrooms ang Bulua National High School sa dili madugay human gitakdang subhan ang 4-storey, 16-classroom building karong adlaw’ng Huwebes, Mayo 25 nga pangulohan ni Mayor Rolando “Klarex” Uy ug mga sakop sa Local School Board.
Ang maong tunghaan usa sa mga pinasahi nga “Tatak Klarex” classrooms nga aduna kini built-in multi-media package nga naglangkob sa SMART TV, projector, sound system ug desktop computer.
Tumong ni Mayor Klarex nga mahatagan og kahamugaway ang mga estudyante lakip mga magtutudlo ug gisiguro gayud niini nga aduna kini functional nga fire alarm system sa panahon nga adunay mga panghitabo.
Dugang pa sa mayor lakip sa iyang classroom projects ang paghatag og mga lingkoranan sa estudyante, teacher’s table, grills sa mga bintana ug comfort rooms.
Ang bag-ong tukoron nga 4-storey, 16-classroom Bulua National High School makatabang sa pagtubag sa kasamtangang emergency classes diin usa sa mga hinungdan sa classroom shortage nga nasinati sa Department of Education.
Lakip sa mosaksi sa groundbreaking ceremony si Schools Division Superintendent Dr. Roy Angelo Gazo, Bulua Punong Barangay Al Legaspi, Jr ug mga kadagkoan sa Department of Education-Division of Cagayan de Oro.
Mahinungdanon sa administrasyon ni Mayor Klarex nga mahatagan og saktong kalidad ang edukasyon diin nag-una usab kini sa iyang mga prayoridad.
(News and photo courtesy of CIO CDO)