Gihatagan og rekognisyon sa National Inter-Agency Task Force kon IATF ang agresibong kampanya sa pagpamakuna dinhi sa Cagayan de Oro aron mapaspasan ang pagkab-ot sa herd immunity sa tibook nasud.
Kini ang gibutyag ni Dr. Ted Yu Jr., medical officer sa City Health Office, human gidayeg sa IATF ang vaccination program sa syudad atol sa ‘Laging Handa’ press briefing niining semanaha.
Sa iyang kabahin, nagpasalamat si Mayor Oscar Moreno sa pagdayeg sa IATF bisan pa man gibutyag niini nga andam motabang ang syudad sa pagpamakuna sa mga kasikbit nga local government units dinhi sa rehiyon.
Gipasabot ni Mayor Moreno nga ang virus dili morespeto og utlanan kon ‘boundaries’, busa importante nga bakunado usab kadtong mga residente nga gustong motrabaho o’ mobisita dinhi sa Cagayan de Oro.
Nasayran nga mosalmot na usab ang Cagayan de Oro City sa ikaupat nga hugna sa nationwide three-day ‘Bayanihan Bakunahan’ nga magsugod ugma Marso 10 ug mahuman karong Marso 12.
(Source: IATF)
