Walo ka paresan nga nagpuyo-puyo na ang gitakdang kaslon ni Mayor Rolando “Klarex” Uy atol sa blessing ug inauguration sa unom ka viewing chapels sa City Memorial Park (kanhi Bolonsiri public cemetery) karong Oktubre 28, 2022.
Kini nga mga kaslonon lakip sa kapin 300 ka mga kanhi nagpuyo ug nanginabuhi sulod mismo sa sementeryo sa pila na ka tuig nga na-profile ug makadawat og balay sa relocation site sa Brgy Pagatpat.
Matud ni Sol P. Mosqueda, focal person sa City Memorial Park project ug Administrative Officer sa City Local Environment and Natural Resources Office (Clenro), mahinungdanon nga legal nga makasal ang mga paresan sanglit lakip usab kini sa rekisitos sa pagkuha og balay.
Samtang, aduna usab gitakdang prayer services alang sa mga Katoliko ug Christians sa chapel sa maong sementeryo sa tibuok adlaw sa November 1 ug 2 alang niadtong buot maghalad og mga pag-ampo sa ilang mga mipanaw nga minahal sa kinabuhi.
Ang City Memorial Park laumang mahimong usa sa pinaka malamboong public cemetery sa nasud nga maghatag usab og disenteng lubnganan sa mga patay.
(Source: CIO-Cagayan de Oro, photo courtesy by Roel Felicitas)