Walo ka bulan gikan karon, bag-ong Tatak Klarex classroom na usab ang mobarog sa East City Central School sa Brgy Lapasan ning syudad human gisubhan karong adlawa, Hunyo 27 ang 4 storey, 12 classroom building nga gipangulohan mismo ni Mayor Rolando “Klarex” Uy.
Ang maong katukoran gikalipay sa mga kadagkoan sa Department of Education – Division of Cagayan de Oro sa pagpangulo ni Schools Division Superintendent Roy Angelo E. Gazo, mga magtutudlo sa East City Central School lakip mga ginikanan ug mga estudyante niini.
Matud ni Mayor Klarex nga nakita niini ang kakulangon sa mga tunghaan dinhi ug maninguha ang syudad nga mahatagan gayud og kaangayan ang tanan nga nanginahanglan.
Dugang ni Mayor Klarex nga mahinungdanon ang edukasyon ilabina ang pagtudlo sa mga kabataan sa maayong pamatasan ug ang pagtahod sa mga ginikanan ug katigulangan.
Ang 4 storey, 12 classroom nga mokantidad og kapin P59 milyones mao na ang ikatulong Tatak Klarex classroom nga tukoron ubos sa administrasyon ni Mayor Klarex diin kompleto na kini sa multi-media package alang sa kasayon sa mga estudyante ug mga magtutudlo.
(News and photo courtesy of CIO CDO)