Mapatuman na ang mga programa ug proyekto alang sa kabatan-onan sa duha ka barangay ning syudad.
Kini human ang Konseho sa syudad ubos ni Bise Mayor Kikang Uy, sa sesyon niadtong Lunes, misagop sa resolusyon nga nag-uli sa resolusyon sa Barangay 6 ug Barangay 37 diin nasukip ang ilang 2022 SK Annual Budget.
Sa Barangay 6 adunay gibanabanang kinitaan ug galastohon balor P290,208.00 samtang sa Barangay 37 mobalor og P328,668.00 ang ilang annual budget.
Gihatagan sa prioridad sa duha ka barangay nga mapatuman karong tuiga ang programa paghatag og dugang kahibalo ug edukasyon kabahin sa panglawas sa kabatan-onan, pagpahigayon og kalihokan pahaum sa kasaulogan sa Linggo ng Kabataan, pagproteher sa kinaiyahan ug uban pang programa alang sa Youth Employment and Livelihodd.
Dugang pa, ang Barangay 6 migahin usab og pundo alang sa kampanya sa batok sa drogra samtang ang Barangay 37 migahin usab og igong pundo nga magamit sa pagpalit og us aka unit nga laptop ug us aka unit nga printer.
Ang resolusyon nga gisagop sa Konseho alang sa maong katuyuan gipaluyohan sa Komite sa Sports and Youth Development ni Konsehal John Michael Seno ug Komite sa Pamalaod ni Konsehal Ian Mark Nacaya.
(Source: CdeO City Council Facebook page)