Opisyal nga gilusad ang “Brigada Eskwela ’23”sa Agosto11 ning tuiga didto sa Galas Elementary ning dakbayan sa Dipolog.
Ang Division kick-off ceremony gisugdan sa usa ka motorkada nga nagsugod sa Zamboanga del Norte National High School-Estaka ug mitapos didto sa tulonghaan nga nahisgutan sa unahan diin didto gipahigayon ang usa ka mabulokon nga programa.
Sa nasangpit nga kalihukan, mipadangat sa ilang tagsa-tagsa ka madasigong mensahe ang mga kadagkoan sa DepEd-Dipolog City Division sa pagpangulo ni City Schools Division Superintendent Dr. Ma. Liza R. Tabilon.
Samtang si Mayor Darel Dexter T. Uy kinsa usa sa hugot nga nagpaluyo sa mga programa sa DepEd ang misaysay nga aron mas molambo pa ang edukasyon sa siyudad, kinahanglan ang kanunay nga pagtinabangay ug panaghiusa alang sa kalamboan sa tanan. Malipayon usab ang mayor tungod kay daghan ang misuporta niining maong kalihukan.
Gipahigayon usab ang Memorandum of Agreement signing tali na sa DepEd ug Bureau of Fire Protection (BFP) alang sa programang “Munting Magigiting na Katuwang (MMK) ni Berong”. Lakip usab sa mga kalihukan mao ang Blood Letting ug libre nga alot (haircut) alang sa tanan. Isip timaan nga pormal nang gibuksan ang Brigada Eskwela, gihimo ang ceremonial “Banging of Gong”.
(Source: Dipolog City Government Facebook page)