Human sa kapin 18 ka tuig, nasulbad na ang boundary dispute tali sa lungsod sa Sirawai ug Sibuco ning lalawigan sa Zamboanga del Norte.
Kini human mipasupot ug resolution si Board Member Peter Co, ang Chairman sa Committee on Local Government and Development sa Sangguniang Panlalawigan, sa pagsagup sa desisyon sa Committee of the Whole nga nagdeklarar ug nagpamatuod sa SP Resolution Number 740, series of 2003 nga opisyal nga mideklarar sa Barangay Cawit-Cawit isip parte sa territorial and political jurisdiction sa lungsod sa Sirawai ning probinsya atul sa ilang regular session niining semanaha.
Sa pagpakighinabi ni Board Member Peter Co siya nagkanayon nga ang bag-ong miyembro karon sa Sangguniang Panlalawigan, ang naglibog tungod kay sukad kaniadtong 2003, walay nahitabong desisyon niini.
Kini makita sa SP Resolution 740 sa tuig 2003, nga dapat adunay ipagawas nga desisyon kalabot niini.
Ug ang usa ka board member kaniadto maoy gitahasan nga mopagawas sa desisyon apan wala kini makita sa record sa maong buhatan.
Dugang ni Board Member Co sila mismo wala nahibalo kalabot niini.
Maayo gani kaniadtong bulan sa Enero niining tuiga, nabanhaw ang maong isyu human nanawagan utro ang Sangguniang Bayan sa lungsod sa Sirawai nga kinahanglan ma-resolbar na ang maong problema.
Niini, gipatawag sa Sangguniang Panlalawigan ang lungsod sa Sibuco aron sa pagkomento niini.
Apan mikomento sila nga dili sila mosugot nga mabulag sa Sibuco ang Barangay Cawit-Cawit.
Human niini, gipatawag sa iyang komitiba alang na sa committee hearing ang mga opisyales sa lungsod sa Sirawai ug Sibuco alang na sa paghisgut niini ug sa pag-areglo apan wala gihapon na-areglo.
Dugang pamahayag ni Board Member Co nga sa maong committee hearing, ilang nadiskubre nga aduna nay resolution nga nagdeklarar nga ang Barangay Cawit-Cawit nahilakip sa lungsod sa Sirawai base sa record nga nautingkay gikan sa secretariat.
Nahitala usab sa maong record nga si Kanhi Board Member Uldarico B. Mejorada maoy gitahasan sa paghimo sa decision apan gikan sa tuig 2003 hangtud karon, walay nakita nga decision base sa minotas.
Niini, si Board Member Co ang nagkanayon nga human sa kapin 18 ka tuig, na-resolbar na sa ilang level sa Sangguniang Panlalawigan ang boundary dispute tali sa lungsod sa Sirawai ug Sibuco.
Gipaabot ni Board Member Co nga sa kabahin sa Sibuco posible pa silang maka-apila ngadto sa korte.
(OIC Lyza Bautista, RPN DXKD Dipolog)
(Source: Provincial Information Center – Zamboanga del Norte)