Davao City – Todo suporta ug siento porsiento suportado ni Gobernador Edwin “Kuya Gob” Jubahib ang 100 ka mga Revitalized Pulis sa Barangay (RPSB) nga gitawag “Bayanihan Troops” nga dili lang magbalantay sa kalinaw ug kahusay apan magsilbi sab nga karpentero ug balay didto sa Sitio Tibucag, Talaingod, Davao del Norte.
Niadtong Huwebes Nobyembre 26, migikan ang Bayanihan Troops aron motabang pagpanday sa 25 desenteng panimalay para sa mga IPs sulod sa 15 ka adlaw. Ang 100 non-combatant troops gilangkoban sa mga polis sa Davao Oriental, Davao de Oro, Davao del Norte ug Davao del Sur nga gikuyogan ug laing 16 ka mga polis nga magsilbing security sa mga polis-panday.
Ang 25 ka mga balay maoy para sa mga Ata-Manobo nga kanhi nailawom sa pagkontrolar sa rebeldeng New People’s Army ug nga karon mibalik sa gobyerno.
Nakadayeg pag-ayo si Davao del Norte Gobernador Edwin “Kuya Gob” Jubahib tungod sa tinamdan sa mga polis nga wala magduha-duha tabangan ang mga IPs bisan kung dili nila kini paryente o kaila.
“Saludo ko sa inyong kakugi ug kadasig sa pagtabang sa atong programa sa ELCAC, sa atong rice-buying program niadtong milabay’ng harvest, KAAGAPAY ug uban pang proyekto sa kalinaw ug kalamboan sa Davao del Norte,” pag-ila ni Kuya Gob sa kontribusyon sa RPSB labina sa bag-ong ‘Pabalay’ nga proyekto sa Sitio Tibucag.
“Importante kaayo ang tribal housing sa Sitio Tibucag. . ato kining gisaad sa mga IPs nga gipriso sa UCCP-Haran compound. Gawas sa atong tumong sa paghatag sa pangunang serbisyo, ato sab nga tinguha nga wala na’y IPs nga magbulag tungod sa problema sa insurhensya. . . Dili nato ni maabot kung wala ang dakong tabang gikan sa atong kapolisan, kasundalohan, ubang mga ahensya sa gobyerno ug manggihatagon nga indibiduwal ug mga organisasyon,” padayong pasalamat sa gobernador.
Sa pagsugod sa termino ni Kuya Gob niadtong Hulyo 2019, gihatagan ug dakong atensyon ang mga Indigenous People (IPs) nga sa dugay’ng panahon “nakalimtan” sa gobyerno nga matubag ang ilang pangunang panginahanglan.
“Your involvement in this project would definitely make a stronger and long lasting impact on our IP communities to ensure the resounding success of our goal to end insurgency and to win the peace. Tungod ini, saad nako nga 100% nga suporta sa probinsya sa tanang program ug kalihokan sa atong kapolisan. Pinaagi sa atong panaghiusa ug pagtinabangay matuman ang atong damgo ug tinguha alang sa tinuod nga kabag-ohan ug kalamboan sa Davao del Norte ug kadaogan laban sa insurgency sa tibuok Pilipinas,” misaad ang gobernador nga maka-masa.
Ang serbisyo sa RPSB giisip nga Bayanihan kay walay dawaton dugang suweldo sa ilang lahi nga asaynment. (davnorpickmo) “Bayanihan Troops”