Nabutos ti Probinsia ti Ilocos Norte ti umuna nga Indigenous People Mandatory Representative (IPMR) iti Sangguniang Panlalawigan (SP), iti Ilocos Norte Centennial Arena idi Nobiembre 15, 2022.
Maibatay iti mandatory law ti National Commission of Indigenous People’s (NCIP) a maaddaan kadagiti pannakabagi ti IP kadagiti lokal a government board, napili ti umuna nga IPMR ti probinsia babaen ti open nomination process.
Kalpasanna, nagtakder dagiti kameng ti Indigenous Peoples Selection Body iti likudan ti napilida a kandidato. Ni Mrs. Cheryll Borromeo Tabangay, child development worker iti ili ti Nueva Era ti pinili ti kaaduan nga IP nga addaan iti pito pulo ket walo a botos.
Nakagun-od iti innem a pulo ket tallo a botos ti kaasitgan a kalabanna a ni Mr. Lorenzo Padama, maysa a Yapayao manipud iti Barangay Kalaw ti Dumalneg.
Ti pannakabagi dagiti katutubo a komunidad iti kangatuan a lehislatibo a bagi ti probinsia ti prioridad ni Gobernador Matthew Marcos Manotoc. Karaman kadagiti immuna nga Executive Orders na ket ti pannakabukel ti health council nga espesipiko a mangtaming kadagiti medikal a kasapulan dagiti indigenous community, partikular kadagiti adayo a lugar a pinirmaan na idi 2019.
Kabayatan ti kallabes nga Executive-Legislative Agenda Workshop ti Gobierno Probinsial, inulit ni Gov. Marcos Manotoc ti kinaganat ti panagbutos iti IP Representative iti Provincial Board.
Kalpasan ti pannakapili ti IPMR iti provincial level, ni Atty. Jesus Agbayani, Provincial Legal Officer ti NCIP, nga iyallatiw ti NCIP ti resulta iti NCIP Regional Office, kalpasanna, mangipaulog iti certificate of affirmation, sakbay a pormal nga agsapata ni Mrs. Tabanagay ken ni Gov. Matthew Marcos Manotoc. (Ronald Domingo)
(Source: Provincial Government of Ilocos Norte)