Nangipaay ni Senador Imee R. Marcos ti educational assistance para kadagiti 2,000 a college students nga annak ti mannalon ken mangngalap ti Ilocos Norte a naapektaran ti Bagyong Egay.
Indauluani Senador Marcos, kaduana ti Department of Social Welfare and Development ti nasao a pannakaipaay ti educational assistance, a naisayangkat iti Cultural Center iti ili ti San Nicolas, idi Agosto 17. Dagiti benipisiaryo manipod iti ili ti Bacarra, Badoc, City of Batac, Currimao, Dingras, Laoag City, Paoay, Pinili, San Nicolas, ken Solsona, ket nakaawat ti P10,000 ti tunggal maysa.
Bayat ti panagbitla iti Senador, inbinglayna a ti “Makabasa Latta Program” ket maysa a programa a nabukel tapno ipaayan ti educational assistance dagiti agtutubo nga agbasbasa ti kolehiyo.
Innayonna nga uray ania a didigra ti mapasaran dagiti mannalon ken mangngalap ti Ilocos Norte ket ikarigatan ken aramidenda ti amin a kabaelanda tapno mapagadalda dagiti annakda. Gapo iti daytoy, napanunot ti Senador a mangipaay ti tulong pinansyal nangnangruna para kadagiti nakaro a nadidigraan a mannalon ken mangngalap nga adda annakna nga agbasbasa ti kolehiyo.
Malaksid iti “Makabasa Latta Program” ket nangipaay pay iti Senador ti kanayonan a pondo para iti gobierno probinsial para kadagiti programa nga Assistance to Individuals in Crisis Situations, Emergency Assistance in Cash, ken Cash for Work Program a mabalin a gundawayan dagiti kaprobinsiaan.
Ti nasao a panagibunong ket inatendaran dagiti kameng ti Sangguniang Panlalawigan nga idadauluani Vice Governor Cecilia Araneta Marcos, Philippine Councilor’s League President Honorable Handy Lao, ken dagiti opisial ti gobierno manipod kadagiti nadakamat nga ili iti probinsia. (Jesusa Mae S. Sumaoang)
(Source: Provincial Government of Ilocos Norte)