Naited ti tulong pinansial nga aggatad iti Php9,765,000 kadagiti 1,953 a mannalon ti pagay iti Piddig, probinsia ti Ilocos Norte kas paset ti Rice Competitiveness Enhancement Fund (RCEF) ti Department of Agriculture (DA).
Pinasingkedan daytoy ni Piddig town Mayor Georgina Guillen idi Miyerkules bayat ti panagyamanna iti administrasion ni Marcos iti panangipangpangrunada kadagiti kasapulan dagiti mannalon ken iti panangipaayna kadakuada iti namnama iti tengnga ti krisis.
Kinuna a dagiti mannalon ket mabalin da a maragpat dagiti panggep ti Masagana 150 ken Masagana 200 a programa ti gobierno nasional gapu iti naan-anay a suporta iti benneg ti farm mechanization, farm credit, ken pannakaaramid ti irrigation systems pakairamanan ti pannakaipaay dagiti nadumaduma nga agricultural inputs.
Karaman ti Piddig kadagiti pilot sites ti farm consolidation program ti gobierno, a mangpabalin kadagiti lokal a mannalon a mangusar kadagiti kabaruan a makinaria tapno maksayan dagiti lugi kalpasan ti panagani ken mapaadu ti matgedanda.
Saklawen ti consolidated farming project ti 2,000 nga ektaria a pakairamanan ti 1,300 a mannalon. Dagitoy ket maimula iti pagay, mais, ken dadduma pay a nangato ti pategna a komersial nga apit agraman ti tabako. Babaen ti public ken private partnership iti nagbaetan ti gobierno munisipal ken ti Piddig Basi Multi-Purpose Cooperative, maipanamnama dagiti mannalon iti pinansial a tulong, farm inputs kas iti bukel, abono, ken pesticides, crop insurance, makinaria, post-harvest ken drying services, pakairamanan marketing dagiti produktoda.
Tapno mapataud ti value chain iti farm production, impanamnama ti lokal a gobierno kadagiti mannalon nga adda gundawayda a makagun-od iti ganansia iti amin a tukad ti panagtalon. (April Joyce Gonzales)
(Source: LGU Piddig)