Naisayangkat idi sabado Nobiembre 5 ti Awarding ken Coronation Night ti search for 2022 Aliwan Fiesta Digital Queen.
Mainaig iti daytoy, impadanon ni Gob. Matthew J. Marcos Manotoc ti panangkablaaw na kenni Miss Ilocos Norte 2022 1st Runner-up Sophia Noreen Ingrid Guillermo ti ili a Dingras a maysa kadagiti tallo a nangiyalat iti “major awards”.
Naammoan a daytoy ti 2nd Runner up iti nadakamat a “beauty contest” nga insayangkat ti Manila Broadcasting Company.
Naragsakan ti gobernador kalpasan a naammoanna a ti napili a reyna ket manipud iti Ilokandia a taga idiay Siudad ti Baguio babaen kenni Miss Marikit Manaois, agtawen ti duapulo ket lima a nagturpos iti Human Resource Development ken agtrabtrabaho iti agdama iti maysa a Solid Waste Management Company.
Para iti gobernador, dakkel a pakaidayawan ti Ilokandia ti panangabak da Manaois kenni Guillermo.
Kabayatanna, ibilang ni Gob. Marcos Manotoc ti pammadayaw a nagun-od ni Guillermo a dakkel a pakaidayawan ti Ilocos Norte.
Innayonna a dakkel a tulong daytoy iti ad-adda pay a pannakaitag-ay ti imahen ti sibubukel a probinsia. (Irene Ringor)
(Source: Provincial Government of Ilocos Norte)