Mangikabil ti Ilocos Norte capitol building rooftop kadagiti solar panels tapno maksayan ti gastos iti koriente iti napaut a panawen.
Babaen ti pondo nga agarup PHP45 million manipud iti National Electrification Administration (NEA), kinuna ni Ilocos Norte Electric Cooperative, Inc. (INEC) acting general manager Cipriano Martinez a nangrugi ti pannakaikabil dagiti solar panel iti kapitolio idi napan a Disiembre ken manamnama a malpas iti mabiit.
Naikkan met ti INEC iti annongen a mangikabil kadagiti solar panel kadagiti public hospitals ken pagadalan. Apaman a malpas, ti solar power project ket addaan iti kapasidad a 470 kilowatts iti kangitingitan ti operasionna ken manamnama a mangkissay iti gastos iti koriente iti probinsia iti 40 a porsiento yantangay mailako iti INEC ti koriente a patauden dagiti solar panel tapno mapapigsa ti suplayna.
Kabayatanna, 28 nga INEC linemen ken tallo nga engineering staff nga umabot 10 a tawenen nga project workers ti nakaawat iti permanent appointment orders.
Malaksid iti panangawatda iti nangatngato a sueldo kas permanente nga empleado, makagun-od met dagiti field workers iti nangatngato a risk pay nga epektibo ita a tawen. (Rod Sadian)
(Source: Provincial Government of Ilocos Norte)