Batac: Kinni-Kinni Parade 2023, nangipaay ti ragsak kadagiti nagbuya

0
10

Nagkaykaysa dagiti nadumaduma a Local Government Units pakairamanan dagiti ahensia ti gobierno ken dagiti Non-Government Organizations a nangipaay ti suporta iti Kinni-kinni Parade a maysa kadagiti aktibidad ti probinsia iti panangrambak ti Women’s Day idi Marso 08.

Tinakderan dagiti duapulo ket maysa nga ili ken dua a siudad ti karida a kaadda ti lalaki nga agserbi a muse dagitoy iti nasao a parada.

Nakaragragsak dagiti umili a nagbuya pakairamanan ni Acting Gov. Cecilia Araneta Marcos a nagbalin a kangrunaan a sangaili ken nagsarita iti Search for Miss Kinni-kinni Queen gapu ta awan ti panaginkukuna dagiti muse iti tunggal ili ken ahensia a nakidanggay iti nadakamat nga aktibidad.

Naisaruno a dagus ti nasao a search kalpasan ti parade. Ni Sanguniang Panlalawigan Member Medeldorf Gaoat ti nangipaay ti panglukat a sarita idinto a naiyam-ammo ti kangrunaan a sangaili ken nagsarita babaen ken ni Sanguniang Panlalawigan Member Portia Salenda kas Chairman ti Family Welfare.

Mainaig iti daytoy, inpaayan ti agak-akem a gobernador ti pammigbig dagiti amin a babbai.

Segun kenkuana, dakkel ti akem dagiti babbai iti kagimongan pakairamanan ti panagdur-as ti ekonomia.

Gapu iti daytoy, impeksana ti napalaus a panagyamanna ken ni Senador Imee Marcos a nangirubuat iti Kinni-kinni idi isu pay laeng ti gobernador ti Ilocos Norte ken intultuloy ni Gob. Matthew J. Marcos Manotoc.

Kabayatanna, inyalat ni Engr. Gerald John Sagadraca ti siudad ti Batac ti Miss Kinni-kinni Queen 2023 a nakaipaayan kenkuana ti gungna a sangapulo ribu a pisos.

Nagun-od met ti muse ti Department of Education a ni Mr. Richard Garganta ti 1st runner-up a nangabakanna ti lima ribu a pisos ken 2nd runner-up ti muse ti Dumalneg a ni Patrolman Jerell Ed Aguinaldo a nangabakanna ti tallo ribu a pisos.

Napadayawan ti siudad ti Laoag a Best Kinni-Kinni group idinto a Most Colorful Group ti ili a Pagudpud ken agpada dagitoy a naipaayan ti gunguna a sangapulo ribu a pisos.

Imbatad ni Mrs. Janet London, mangidadaulo ti Gender and Development Office a dagiti premyo ket inpaay ni Cong. Ferdinand Alexander Sandro Marcos ti umuna a distrito ti probinsia. (Cita Macalipis)

(Source: Provincial Government of Ilocos Norte)

Leave a Reply