Balligi ti pannakairubuat ti Producer to Consumer Program iti nagbaetan ti Ilocos Norte ken ti San Juan City ita nga aldaw.
Daytoy ti siraragsak nga inpakaammo ni Mrs. Elma Gabriel, mangidadaulo ti Micro Small and Medium Enterprise Office ti gobierno probinsial.
Inpakaammona a kalpasan ti panagpinnirma da Gob. Matthew J. Marcos Manotoc ken San Juan City Mayor Francisco Javier “Francis” Manlapit Zamora iti Memorandum of Agreement ket naitampok a nailako ti maysa kadagiti ipagpanpannakkel a produkto ti Ilocos Norte nga empanada.
Imbatadna a kas kadagiti dadduma a lugar a pagturturongan dagiti MSME’s ti probinsia ket magustoan pay dagiti umili idiay San Juan dagiti dadduma pay a produkto ti probinsia.
Impalgakna a gapu ta maibilang pay laeng a soft launching ti naisayangkat iti daytoy a panagturongda iti nadakamat a siudad ket dagiti pay laeng maibilang a best products ti Ilocos Norte ti intugotda.
Kunana a saan a mailadawan ti kinaragsakda gapu ta paspasig a positibo dagiti komento a mangmangngeganda iti kaaddada iti nadakamat a siudad.
Innayonna a mangrugi iti masungad a bulan ti Pebrero ket binulanton nga agturong dagiti MSME ken dagiti mannalon ditoy probinsia idiay San Juan City. (April Gonzales)
(Source: Provincial Government of Ilocos Norte – Communications & Media Office)