Nangisayangkat ti Departamento ti Agrikultura (DA) iti Kadiwa program ditoy Ilocos Norte iti naglabas nga bulan iti Oktubre 28.
Naammoan a naituding a maisayangkat ti nasao nga aktibidad iti Ilocos Norte Centennial Arena.
Segun kenni Ms. Vannesa Dagdagan, Provincial Director ti Bureau of Fisheries and Aquatic Resources (BFAR) a makibinnulig dagitoy iti nasao nga aktibidad.
Inlawlawagna a paset daytoy iti napinget a kalikagum ti ahensia a mangtulong kadagiti “fish cage operators” iti sabali a probinsia kangrunaanna idiay probinsia ti Pangasinan.
Imbatadna a malaksid a matulongan dagiti maseknan a mangilako kadagiti produktoda ket matulongan pay dagiti kakailian ditoy Ilocos Norte a makagatang iti nalaklaka a presio ti ikan kangrunaanna iti bangus.
Inbunannag ni Dagdagan nga umab-abot iti maysa punto tallo gasut limapulo a metriko tonelada ti bangus nga aggapo idiay Pangasinan a mailako iti Kadiwa.
Innayonna a malaksid iti bangus ket manamnama nga adda pay dagiti mailako a “dried fish” ken dagiti dadduma pay a naiproseso nga ikan a naggapo iti sabali a probinsia. (Cita Macalipis)
(Source: Provincial Government of Ilocos Norte – Communications & Media Office)