Naruay a kakailian ditoy Ilocos Norte ti natulungan bayat ti panawen ti pandemia a gubuay ti COVID-19. Segun ken ni Engr. Pedro Agcaoili Jr., Provincial Planning and Development Officer, daytoy ti maibilang a kangrunaan a naaramidan ti gobierno probinsial ita a tawen 2022 iti babaen ti liderato ni Gob. Matthew Marcos Manotoc.
Inlawlawagna a bayat ti panangrugi ti pandemia ket kinataripnong ti gobernador dagiti nadumaduma a departamento kangrunaanna dagiti kameng ti local finance committee no ania dagiti nasken a maaramid tapno agtultuloy ti panaggunay ekonomia ti Ilocos Norte.
Inbunannagna a nai-realign dagiti “savings” ti probinsia para kadagiti kasapulan dagiti kakailian. Impalgak ni Agcaoili a daytoy ti rason a basar iti resulta ti survey ti Phil. Statistics Authority wenno PSA ket saan unay a naapektaran ti ekonomia ti probinsia iti pandemia.
Imbatadna a bimmaba pay ti “poverty incidence rate” ti Ilocos Norte ita a tawen 2022 a dimmanon iti 2.5 a porsiento. Kunana a kangrunaan a napintas a nagapoanan ti probinsia ket iti benneg ti salun-at nangnangruna iti igagatang ti gobierno probinsial ti bakuna kontra iti COVID-19 ken iti pannakitinulongna kadagiti Local Government Units a nangipasdek kadagiti quarantine facilities. (Ronald Domingo)
(Source: Provincial Government of Ilocos Norte)