Kinuna ni ABC president Elmer Faylogna idi Enero 23 a panggep ti pannakaipasdek ti community garden iti tunggal barangay a maitandudo ti organic gardening ken nasalun-at nga estilo ti panagbiag bayat a matulongan ti pagilian a manggun-od iti food security.
Kinunana iti interbiu. “Pasayaatenda dagiti hardin ti komunidad kas suporta iti panagregget ti gobierno nga agbalin a food-secure a Pilipinas”. Kas suporta kadagiti barangay, agtultuloy ti panagiwaras ti gobierno Ilocos Norte kadagiti bukel ti nateng, insect repellent ken organic fertilizers.
Mangitukon met ti Technical Education and Skills Development Authority (TESDA) iti libre a kurso maipapan iti organiko a produksion ti apit bayat ti panangibilinna kadagiti agtutubo nga out-of-school, pakairamanan dagiti agtagibalay ken dagiti marginalized earners a mangadal kadagiti baro a wagas a mangpataud kadagiti organiko a prutas ken nateng. Iti ili ti Currimao, idauluan met ti lokal a gobyerno ti tinawen a nadalus ken berde a pasalip iti nagbaetan dagiti barangayna a nakaipasdekanda iti bukodda a komunal a hardin.
Aniaman a mapataud iti komunal a hardin ket maibinglay iti komunidad bayat nga aniaman a sobra ket mailako iti merkado.
Kas kadadalus ken kaberberdean a barangay ken hall of fame awardee ita a tawen, kuna ni Lang-ayan village chief Gemma Fernando nga agyaman iti amin a suporta dagiti konstituentena iti panangtaginayon a nadalus ken nasalun-at ti purokda.
Karaman ti Lang-ayan kadagiti kadakkelan a barangay iti ili ti Currimao. Kinuna ni Fernando a gundawayanda dagiti idle lots-da a namulaan iti papaya ken iti igid dagiti kalsada iti malunggay (Moringa oleifera) no sadino a libre ti maapit ti asinoman iti barangay.
Adda idi tiempo a simrek ti local government unit iti memorandum of agreement iti maysa a kompania ti prutas ken nateng a sadiay ilakoda kadakuada dagiti produktoda.
Innayun na pay a “Gapu iti panagngato ti presyo dagiti basic commodities, dakkel a tulong kadakwada iti barangay nga agpipinna-inspirarda a mangpataud iti bukodda a taraon. Nasalun-at ta organiko ti imulada babaen ti vermiculture. (April Gonzales)
(Source: Provincial Government of Ilocos Norte – Communications & Media Office)