Naiyalat ti Ilocos Norte ti Grand Prize iti Best Mental Health Implementer Award manipud iti Department of Health Region I Center for Health Development.
Mainaig iti daytoy, inpakaammo ni Mrs. Divine Sevilla, counselling professional ti Speak Up, I’m Here wenno SUIH ti gobierno probinsial a maawat ti probinsia ti nasao a pammadayaw iti masungad a Disiembre dose iti regional office ti Department of Health wenno DOH idiay San Fernando City.
Impalgakna a basar iti pannakabagi ti DOH ditoy rehion uno gapu iti pannakagun-ud ti probinsia iti nasao a pammadayaw ket adda ti agur-uray a duapulo ket lima ribu a pisos a gunguna ken dadduma pay a surpresa a mabalin a maipaay iti probinsia.
Inlawlawagna a binigbig ti DOH dagiti agkakapintas a programa, ganuat ken aktibidad nga ipatpatungpal ti SUIH.
Segun ken ni Sevilla, nupay saan nga inbinsabinsa ti pannakabagi ti DOH ti rehion uno ket inbunannagna nga adda ti pito nga “indicators” a kangrunaan a makagapo iti panangiyalat ti probinsia iti nasao a pammadayaw.
Mainaig iti daytoy, imbatadna a saan a magun-ud ti nasao a pammadayaw no saan a gapu iti naiget a suporta ni Gob. Matthew Marcos Manotoc.
Inpanamnamana ti panangaramid ti SUIH ti amin a kabaelanna tapno magutigot dagiti amin nga ili ken siudad pakairamanan dagiti barangay ditoy Ilocos Norte nga agbalin nga aktibo a mangkita iti “mental health” dagiti kakailian.
Innayonna a maysa kadagiti planplanoenda nga iyuswat ti Search for Project Proposal on Mental Health Initiatives in Ilocos Norte iti masungad a tawen malaksid pay iti maidiaya a “mental health psycho social support”.
Namnamaen ni Sevilla nga iti tulong ni Gob. Marcos Manotoc ket agtultuloy ti napintas a pannakitimpuyog kadakuada iti pannakaipatungpal ti nasao a programa ti Provincial Health Office, Ilocos Norte Youth Development Office, Communications and Media Office, dagiti kameng ti media, Provincial Social Welfare and Development, Mariano Marcos Mem. Hospital and Medical Center, Public Employment Service Office ken dagiti dadduma pay nga ahensia a naiget a tumultulong kadakuada. (Irene Ringor)
(Source: Provincial Government of Ilocos Norte)