Pormalen a nainaguraran iti Ilocos Norte Eco Hub iti Sitio Bato, Brgy. 6 Tonoton iti ili a Piddig nga inatendaran da Governor Matthew Marcos Manotoc, Vice Gov. Cecil Araneta Marcos ken dadduma pay nga opisial ti probinsia pakairamanan dagiti opisial dagiti private entity.
Immuna a nebendisionan ti pasdek babaen kenni Rev. Fr. Prim Geronio Cabanos Jr. iti St. Ann Catholic Church ti Piddig sakbay a narugian ti programa ken panangipaay iti mensahe da Mayor Eddie Guillen ti Piddig, Mr. Rommel Benig, Chief Operation officer ti Green Antz Inc. Mr. Gabby Mejia Prees. Ken CEO NLR ken Northwind ken ti pannakabagi n Mr. Ramon Manotok, president operator / Sustainabuild Corp.
Naragsakan ken nagyamanan ti Gobernador kadagiti maseknan iti pannakaipasdek ti nasao a proyekto a nakibinnuligan ti LGU Piddig ken ti gobierno probinsial a dakkel a makatulong iti pannakasulbar ti problema iti basura ditoy probinsiya.
Ti Ilocos Norte Eco Hub ti pakarimitan wenno pakatunawan dagiti basura kangrunaanna dagiti plastic manipud kababassitan wenno dagiti sachet a mapagbalin a hollow blocks, tugaw ken dadduma pay babaen iti pannakaaramat dagiti machines.
Impanamnama met ti gobernador ti naan anay a supurta ken aniaman a kontribusyon tapno agbalin a nabunga ken naimballigian ti nadakamat a proyekto.
(Source: LGU Piddig, Ilocos Norte)