Napagsasaritaan itay laeng kallabes ti posible a pannakaipatakder ti maysa a hyrdo-power plant iti surungen a paset ti ili ti Vintar, kalpasan a pinasyar dagiti kontratista ni Mayor Richard Agregado Degala.
Iti nasao a panagbisita dagiti interesado nga agpuunan iti proyekto, inpresentar ti pannakabagi ti Pavi Green a ni Mr. Xaviery N. Penisa ken dagiti consultants dagitoy manipud iti ballasiw-taaw dagiti posible a mapasamak nu bilang agtultuloy ken agballaigi ti nasao a proyekto.
Iti agdama ket ad-adalenen dagitoy ti posible a pannakaipatakder ti hydro-power plant a mangitunda iti pagsapulan ken pannakapasayaat ti pannakatagiben ti aglawlaw ken ti kabanbantayan.
Mangnamnama met ti ama ti ili nga awan koma ti lapped ti pannakaimplementar daytoy a proyekto tapnon manayunan ti pagsapulan ti kaban ti lokal a gobierno, kangrunaanna ket maaddaan iti pagsapulan dagiti dadduma nga umili iti Vintar.