Inatendaran ni Gobernador Mathew Marcos Manotoc iti Graduation ceremony dagiti 4P’s beneficiaries wenno dati a kameng ti Pantawid Pamilyang Pilipino Program ti gobierno nasional iti San Nicolas National High School.
Malaksid ken ni Gobernador Marcos, dimmar ay pay ni DSWD secretary Erwin Tulfo, Provincial Social Welfare and Development Officer Mrs. Lilian Rin, MSWD ken CSWD officers, dagiti Mayor, bise Mayor iti Ilocos Norte ken dadduma pay a bisita.
Agarup 824 a miembro ti 4P’s ti nagreduar wenno naikkaten manipud iti listaan dagiti 4P’s a tultulungan ti gobierno nasional kalpasan a simmayaat iti kasasaad ti panagbiag da ken nakapagturpusen dagiti annak da.
Siraragsak pay ti gobernador a nangipakaammo a manipud idi 2018 sakbay iti covd 19 pandemic agigga itay napan a tawen 2021 bimmaba iti poverty rate ti Ilocos Norte iti 2.5 percent., maibasar iti data ti Phil. Syatistics Authority wenno PSA.
Mainaig iti daytoy, inkari manen ti gobernador nga adda laeng daytoy ken ti gobierno probinsial pakairamanan ti DSWD a mangipaay iti tulong bayat a mangrugrugi pay laeng dagiti annak wenno pamilya a naikkaten iti listaan manipud iti 4P’s.
Inlawlawag na nga adda iti programa ti probinsia nga “Agri ka Dito” kadagiti agtaltalon idinto nga adda met ti PESO office kadagiti agsapsapul ti pagtrabahuan ken ti MSME’s kadagiti mayat a mangrugi iti negosio.
Kunana nga adda pay ni Pres. Ferdinand Bongbong Marcos, senadora Imee Marcos , Congressman Sandro Marcos ken ni Diputado Angelo Marcos Barba nga agtitinnulong a mangbitibit kadagiti kailian a makasapul iti saranay. (Cita Macalipis)
(Source: Provincial Government of Ilocos Norte)